ХРАМ-ЧАСОВНЯ ЕПИСКОПА ДАМАСКИНА И ИСПОВЕДНИКОВ КАТАКОМБНЫХ

Вторник, 19.03.2024, 05:46

Приветствую Вас Гость | RSS | Главная | Акафист Святым Царственным Великомученикам | Регистрация | Вход

Акафист Царю-искупителю Николаю II


Кондак 1


Богоизбранне Руси искупление и Христовой любви воплощение, воспеваем ти похвальная, яко паче всего Отечество свое возлюбившему, ты же, яко имеяй дерзновение ко Господу, просвети
омраченныя умы и сердца наша, да зовем ти: Радуйся, Царю Николае, искупителю греха народа Российскаго!


Икос 1


Ангелов Творец посла тя земле Российстей, яко ангела незлобия и вразумления к народу твоему, тя бо избра по образу Сына Своего Единороднаго в жертву искупления за грех народа Российскаго, мы же, дивящеся таковому о тебе промышлению Вседержителя, с умилением вопием ти:


Радуйся, Христу уподобление! Радуйся, жертво всесожжения! Радуйся, Российских царей украшение! Радуйся, незлобия и всепрощения образ подавый! Радуйся, обидимых неложное упование! Радуйся, веры нерушимое основание! Радуйся, Николае, Царю-искупителю греха народа Российскаго!


Кондак 2


Видящи всеблагая Богомати в уделе Своем страну нашу мерзостию растления оскверняему, избра тя от рождения, яко чистейшаго, Руси бо во очищение, да вси надгробное рыдание тебе творим песнь: Аллилуиа.


Икос 2


Разум Предвечный предуведе тя ко спасению и житию твоему прообразование Иова многострадальнаго, рождение твое и память праведника сочетавая. Мы же, наш грех неверности тебе поминающе, с трепетом сердечным и сокрушением душевным вопием ти сице:


Радуйся, хулы и напасти от народа твоего претерпевый! Радуйся, веру до конца сохранивый! Радуйся, образе кротости! Радуйся, светильниче правды! Радуйся, блюстителю богопочтения! Радуйся, правило смирения! Радуйся, Царю Николае, искупителю греха народа Российскаго!

 

Кондак 3


Сила Вышняго осени тя, Боговенчанне Царю Николае, лжемудрствующу западу вразумление противоратное соделавшаго, да мир Богу возопиет: Аллилуиа.


Икос 3


Имея тщание о вразумлении заблудших, поревновал еси благоверный Царю, храмов созиданию, мощей святых угодников Божиих прославлению, просвещения христианскаго насаждению и обездоленных от насилия ограждению, да мир христианский вопиет ти таковая:


Радуйся, святителя Николая на земли соимените! Радуйся, преподобнаго Серафима на Небеси сомолитвенниче! Радуйся, православия насадителю! Радуйся, света Христова носителю! Радуйся, терпения христианскаго учителю! Радуйся, православным христианом заступниче! Радуйся, Царю Николае, искупителю греха народа Российскаго!


Кондак 4


Бури безумия и злоречия не убоялся еси, Царю-искупителю Николае, егда согласие со враги на пагубу Отечества отвергл еси, злохуления, заточение и умерщвление претерпел еси, вопия Богу Вседержителю: Аллилуиа.


Икос 4


Слышаще державы Российския нестроение и видяще христиан разделение, молился еси, не преставая, да спасет Всеблагая Русь православную. Сего ради вопием ти:


Радуйся, молитвы кадило благовонное! Радуйся, лампадо веры неугасимая! Радуйся, буйствующих кротостию вразумление! Радуйся, неутешных в скорбех утешение! Радуйся, Небесных благ любителю! Радуйся, правды ревнителю! Радуйся, Царю Николае, искупителю греха народа Российскаго!


Кондак 5


Боготечная звездо Россияном в разсеянии сущым явился еси, Царю Николае, о имени твоем во едино их собирая и путь Христов к воскресению земли Российстей показуя, да поют ангели песнь о кающихся грешницех: Аллилуиа.


Икос 5


Видя, яко кротость и смирение твое ничтоже успевают, все упование на Пречистую возложил еси и в руце Вседержителя всего себе предал еси, да и безумныя вразумит во еже пети тебе:


Радуйся, гордыни победителю! Радуйся, венца Небеснаго носителю! Радуйся, немощных стено необоримая! Радуйся, гордых вразумителю! Радуйся, к людям своим любовь преизобильная! Радуйся, за измену нашу жертво усердная! Радуйся, Царю Николае, искупителю греха народа Российскаго!


Кондак 6


Проповедуют концы вселенныя славу твою, во всю землю изыде слово твое, яко несть тоя жертвы, юже не принесл бых за благо Отечества своего, научая тем люди твоя благодарственно пети Богу: Аллилуиа.


Икос 6


Возсиял еси паче солнца земли Российстей, Царю Николае, православному на роду заступление даже до смерти явивый, да вси ко Христу обращаются и к тебе прибегают, сего ради воспеваем ти таковая:


Радуйся, свете от востока исшедый! Радуйся, образе царем православным! Радуйся, правды сияние неистощимое! Радуйся, кротости светило незаходимое! Радуйся, грешников отчее вразумление! Радуйся, праведников усердное прославление! Радуйся, Царю Николае, искупителю греха народа Российскаго!


Кондак 7


Хотяй веру православную на земли утвердити, подвигл еси все царство твое на заступление обидимыя страны Сербския, да вси вопиют Богу: Аллилуиа.


Икос 7


Новаго тя Ноя, строителя спасения народу Российскому яви Господь, да вси труды твоя поминающе, непрестанно воспеваем ти сицевая:


Радуйся, Российскаго корабля водителю! Радуйся, славян в бедах утешителю! Радуйся, Сербстей страны заступление! Радуйся, россиян окормление! Радуйся, миролюбия возвестителю! Радуйся, христианских добродетелей насадителю! Радуйся, Царю Николае, искупителю греха народа Российскаго!


Кондак 8


Странное чудо видим на тебе, Николае, десницею Всевышняго многажды спасаеме, со чады же и сродники мученическим венцем венчаеме, да Богу Промыслителю всяческих вопием: Аллилуиа.


Икос 8


Весь еси всем христианом заступник явился еси, Богоизбранне Николае, сугубое заступление народом славянским показуеши, на похвалу подвизая пети тебе:

 

Радуйся, защито обидимых! Радуйся, вразумление обидящих! Радуйся, скорбных прибежище! Радуйся, гонимых заступниче! Радуйся, в житии твоем миротворче! Радуйся, по убиении твоем христианом поборниче! Радуйся, Царю Николае, искупителю греха народа Российскаго!


Кондак 9


Всякими чудесы яви Господь благоволение Свое Российским людем, дондеже преогорчиша Господа зело, но тобою к покаянию призываемы, купно воспоим Богу: Аллилуиа.


Икос 9


Ветия многовещанныя, яко рыбы безгласнии, не возмогут возрещи высоту твоего терпения, мы же глубину падения нашего созерцающе, в сокрушении духа взываем:


Радуйся, терпение необоримое! Радуйся, верносте христиан непоколебимая! Радуйся, гордыни сокрушение! Радуйся, безумных умудрение! Радуйся, образ верным в житии и мученичестей кончине давый! Радуйся, за грех народа своего пострадавый! Радуйся, Царю Николае, искупителю греха народа Российскаго!


Кондак 10


Спастися хотяй всем человеком, иже на крови мучеников Своих Церковь основавый, Сердцеведец Христос положи тя, Царю-искупителю Николае, во основание новыя храмины державы Российския, да вси в ней сущия вопиют Богу: Аллилуиа.


Икос 10


Стена еси всем к тебе с верою прибегающим и необоримое ограждение миру православному еси, научая вся верныя славити тя сице:


Радуйся, на земли Небесных явление! Радуйся, оскудевающих добродетельми восполнение! Радуйся, заре в земли Российстей возсиявшая! Радуйся, реко, все пределы ея напитавшая! Радуйся, смиренномудрия учителю! Радуйся, веры и любви насадителю! Радуйся Царю Николае, искупителю греха народа Российскаго!


Кондак 11


Пение Пресвятей Троице даже до смерти приносяще, течение скончал еси и веру соблюл еси, еюже вся православныя христианы под визаеши пети: Аллилуиа.


 

 

Икос 11


Светодателем послан быв земли нашей, яко Агнец непорочный, полагаешися во искупление греха нашего, да вси непрестанно тя славим:

 

Радуйся, боголюбезная жертво! Радуйся, любвеобилие неистощимое! Радуйся, верности Христовы похвало! Радуйся, всеяние Духа незримое! Радуйся, зерцало премудрости! Радуйся, ненадеющихся надеждо! Радуйся, Царю Николае, искупителю греха народа Российского!


Кондак 12


Божественная благодать немощная врачующи предуведе тя, яко врачевство неистощимое владомым твоим, вопиющим Богу: Аллилуиа.


Икос 12


Поюще страдания твоя, Царю-искупителю Николае, покланяемся терпению твоему, яко силе Всемощныя Троицы явльшейся на тебе, да вси согласно вопием:


Радуйся, возлюбленное чадо Христово! Радуйся, непорочная чада твоя и верныя слуги ко Христу приведый! Радуйся, Царице праведною и мученицею быти пособствовавый! Радуйся, народ твой истине наставивый! Радуйся, Отечества чести не посрамивый! Радуйся, Царство Небесное стяжавый! Радуйся, Царю Николае, искупителю греха народа Российскаго!


Кондак 13


О пречудный и преславный Царю-искупителю Николае, призри на царство твое земное и люди твоя, всякаго бо ответа о гресе нашем недоумеем, и умоли Вседержителя, да не внидет в суд с нами, но сподобит ны непрестанно воспевати: Аллилуиа.


(Этот кондак читается трижды, затем икос 1 и кондак 1)

 

 

 

МОЛИТВА

ко Святому Великомученику

Благоверному Царю Николаю

 

О, святый великомучениче, победоносче и целебниче царю Николае! Вопрошая, яко Исаак Авраама, Господа вопрошал еси: Где есть овча, еже во всесожжение? И, отвещая, отвещал еси Владыце твоему: Аще потребна жертва за Русь Святую, аз есмь жертва сия. Сим же, яко первосвященник за грехи народа твоего, ходатай не без крови ко Престолу Троицы Святыя пришед, моли о нас, о страдальче пятдесятолетний, Бога твоего, да не убоимся страданий за Христа; и, якоже привел еси народ твой к славной победе над злым врагом, поне и чрез двадесять и осемь лет сице приведи и нас к победе над злою волею нашею и над врагами царства твоего; и, яко уневестил еси семью твою Небесному Жениху, сице и сирых младенцев русских напитай, ухлеби, уцеломудри; и, яко же Новый Николай Чудотворец, сшествуй нам тесным путем, ко Христу приводящим. О, дивный воеводо рода русскаго! Поборствуй Руси Святой противу новаго ига, агарянскаго и ляшьскаго злейша; накажи, но помилуй, попали, но исцели: умоли Господа и Пречистую Матерь Его не быти в конец оставленней земли нашей. Да будет на нас державная воля твоя. Да будет с нами отчая милость твоя; и, яко умножися вопль содомский от земли нашея, призри милостивно на ны, яко же и Господь Бог наш в Троице славимый древле посети любовию Своею оныя содомляны; тако да очистит ныне и нас Бог огнем любве твоея. Аминь.

 

Форма входа

Поиск

Календарь

«  Март 2024  »
ПнВтСрЧтПтСбВс
    123
45678910
11121314151617
18192021222324
25262728293031

Архив записей

Наш опрос

Оцените мой сайт
Всего ответов: 20

Статистика


Онлайн всего: 1
Гостей: 1
Пользователей: 0